Beste behin, Zineuskadik, EZAErekin eta EITBrekin elkarlanean, txikien sormena suspertu eta pantaila handian eta euskaraz ikusten diren filmen aldeko apustua egin du. Oraingo honetan Euskal Herriko bost zinema - aretok eta Multibox-EiTBk hartuko dute parte. 

Abenduaren 26an, osteguna, hasiko da Zinegabonak ekimenaren edizio berria. Lau egunez, 10 film proiektatu eta hiru tailer egingo dira Euskal Herriko hainbat udalerritan. Zineuskadik, EZAErekin eta EiTBrekin elkarlanean, antolatutako ekimena Multibox– EiTB aretoetan, Donostiako Principe zinemetan, Bilbo eta Iruñeko Golemen, Beasaingo Usurbe aretoan, Mungiako Olalden eta Urruñako Itsas-Mendi zineman burutuko da. Tailerren eta filmeen prezioa berbera izango da: saio bakoitzeko 1€-koa.

Oraingo honetan, tailerrak Takeshi Nagate eta Kazue Monno artista japoniarrek garatutako Pika-pika (‘dir dir’ euskaraz) teknikarekin burutuko dira. Partaideek argiaren bidezko marrazketa edo Light Painting izenez ezaguna denarekin gozatu ahal izango dute. Teknika hori, batez ere, Picassoren argazkien bitartez ezagutzera eman zen, linternarekin airean zezenak marrazten baitzituen, besteak beste. Euskarri digitalen zabalkuntzarekin batera hasi ziren erabiltzen prozedura hau animazio teknika bezala, paperean eginiko marrazketa linternaren argiarekin airean egindako diseinuengatik ordezkatuz. Tailerraren bukaeran, parte-hartzaileek sortutako obra proiektatuko da. Horregatik, beharrezkoa da sakelako telefonoak edo linternak eramatea.

Programazioa

Gainerako egitarauari dagokionez, nabarmendu beharrekoa da familia osoarentzako filmak direla. Hala, adin ezberdinetako ikusleek aisialdiaz euskaraz gozatu ahal izango dute pelikula hauekin: Maya Erlea 2: ezti jokoak (Australia, 83’), Harpetarra (Erresuma Batua, 90’), Zikoina (USA, 87’), Paddington (Erresuma Batua, 95’), Ploey (Islandia, 83’), Smallfoot (USA, 96’), Luis eta extralurtarrak (Alemania, 86’), Oin Handiren semea (Belgika, 92’), The Wish Fish (Espainia, 71’) eta Aita, zonbia naiz (España, 80’).

Honako hau da tailerren eta filmen egutegia:

MULTIBOX ARETOAK – BILBO
Osteguna, abenduak 26, 11:30 – Animazio tailerra
Ostirala, abenduak 27, 11:30 – Harpetarra

PRÍNCIPE ZINEMAK - DONOSTIA
Ostirala, abenduak 27, 11:30 – Animazio tailerra
Larunbata, abenduak 28, 11:30 – Paddington
Igandea, abenduak 29, 11:30 – Harpetarra

OLALDE ZINEMAK - MUNGIA
Osteguna, abenduak 26, 11:30 – Animazio tailerra
Larunbata, abenduak 28, 11:30 – Ploey

USURBE ZINEMAK - BEASAIN
Osteguna, abenduak 26, 11:30 – Animazio tailerra
Larunbata, abenduak 28, 11:30 – Smallfoot
Igandea, abenduak 29, 11:30 – Maya Erlea 2: Ezti jokoak

GOLEM ALHONDIGA – BILBO
Larunbata, abenduak 28, 11:30 –Luis eta Extralurtarrak
Igandea, abenduak 29, 11:30 – Oin handiren semea

GOLEM BAIONA – IRUÑEA
Larunbata, abenduak 28, 11:30 – Oin handiren semea
Igandea, abenduak 29, 11:30 – Maya Erlea 2: Ezti Jokoak

ITSAS MENDI ZINEMA – URRUÑA
Larunbata, abenduak 28, 11:30 – The Wish Fish
Igandea, abenduak 29, 11:30 – Aita, zonbia naiz